Нядзеля, 18 студзеня, стала для нашай парафіяльнай супольнасці днём асаблівага святла. У дольным касцёле Маці Божай Будслаўскай прайшоў доўгачаканы дзявяты Баль Усіх Святых. Сёлета свята было аб’яднана моцнай і заклікальнай тэмай — «Адвага супраць цемры».

Ужо на ўваходзе, дзе сустракалі гасцей, панавала атмасфера хрысціянскай радасці. На пункце рэгістрацыі старэйшая касцёльная моладзь, ветліва вітаючы кожнага «святога» і «анёла», дапамагала з падрыхтоўкай бэйджыкаў. Гэты жывы прыклад служэння адразу наладжваў прысутных на хвалю еднасці і сяброўства.

Сапраўдным духоўным падарункам для ўдзельнікаў стала батлейка. Гэта кранальнае прадстаўленне падрыхтавалі дзеці, якія наведваюць заняткі па катэхезе, пад кіраўніцтвам нашых сясцёр назарэтанак. Праз традыцыйнае мастацтва юныя артысты здолелі перадаць глыбокія сэнсы веры, нагадваючы, што нават маленькае святло здольнае разагнаць вялікую цемру.

Тэма адвагі знайшла свой працяг і ў выставе малюнкаў. Сёлета ўдзельнікі конкурсу разважалі над сюжэтам «Жыццё святога Максімільяна Марыя Кольбэ». Праз маляўнічыя творы дзеці паказалі подзвіг чалавека, які не пабаяўся цемры нянавісці, выбраўшы любоў і ахвярнасць.

Дзявяты Баль паказаў, што адвага — гэта не адсутнасць страху, а рашучае жаданне ісці за Хрыстом разам з усёй парафіяльнай сям’ёй.

Шчыра дзякуем кожнаму, хто далучыўся да стварэння гэтага незабыўнага свята! Дзякуючы вашай супольнай працы і адкрытасці, гэты Баль стаў сапраўдным сведчаннем таго, што разам мы — моцная і адважная парафіяльная сям’я, гатовая несці святло Хрыста ў свет.

Фота IX парафіяльны Баль Усіх Святых

">Відэа ІX парафіяльны Баль Усіх Святых